<<我覺得好多人重視犧牲，多過outcome>>
我相信好多打工仔都經歷過類似嘅情況，你阿哥或者阿姐畀一個project你做，佢有時唔係最緊張嗰個project 做出嚟有幾成功，佢係好介意你犧牲同付出咗幾多，冇錯啦，佢除咗介意個project嘅結果，仲要干涉你個過程有幾dedicated, ot咗幾耐。如果你畀佢知道呢個project 係毫無難度，佢會覺得益咗你，冇理由嘅，一定係你懶，諗捷徑完成。阿哥阿姐如果知道你困難重重，做到死下死下先至完成到，佢哋係會暗爽。 因為我覺得大家慣性享受，睇到別人受到挫折之後，先獲得成功。
所以有好多公司，最受到老細垂青嘅，唔係做得最efficient, 最多嘢嘅夥計。最受老細青睞，係嗰啲成日喺公司磨爛蓆，平時ot得最耐，感覺上抵得諗犧牲多，冇工都有勞，好似好dedicated, 其實係做嘢冇乜效率嘅員工。畢竟華人社會上，總係會有一份「付出咁多，冇工都有勞，論資排輩」嘅倫理。
但係如果你係一個精明嘅老闆，想間公司好，你應該要重視每件事嘅成效，多過每件事嘅過程。正如愛迪生所有嘅發明，人哋buy嘅，唔係佢失敗嘅無數次過程，只會係成功嗰一次結果。 當然你可以佩服一個人願意犧牲好多時間，好堅毅，但我會支持有能力嘅人， rather than 一個永遠唔成功而犧牲好多嘅人。(你好難叫人盲撐一個永遠失敗嘅人。)
重視犧牲，多過重視outcome, 唔只係office裏面出現，喺個社會度亦好顯然易見。
你會因為馬國明捱咗好多年，提名咗好多次，而被佢說服到，冇咩人睇個套劇，係佢咁多劇之中，咁多候選人之中最優秀。
你會因為劉青雲無數次嘅落敗，而說服自己<<我要成名>> 呢套電影，佢嘅表現係出色過以往嘅劉青雲，如果你認真啲諗下，你會發現，我哋會無啦啦陷入一個logic: 只要一個人捱咗好耐，就理所當然要reward 佢
見到大家會因為子華賣左層樓，同埋過去嘅言論，揚言要瘋狂入場睇佢嘅電影。點解要單憑佢嘅過去，來支持佢嘅現在？佢套戲好唔好睇，同層樓其實冇乜嘢因果關係。
黃子華套戲如是，小店如是，黃店如是 ...
你會因為佢嘅立場幫襯，呢件事係冇問題，但我唔會因為佢嘅立場，說服自己硬食冇實力嘅任何商品。 黃色小店都唔可以單靠佢嘅立場，想人盲撐，畢竟佢係打開門口做生意，我買嘅係product唔係effort.
我會睇，好睇就話好睇，唔好睇就話唔好睇。唔使 賣弄煽情，話要幫佢買返層樓返嚟，公道咁對佢嘅作品作出評價，先至係對一個有才華嘅人最大嘅支持。
Search